உயர்நீதிமன்ற நீதிபதிகளாக த.லிங்கேஸ்வரன், பா.கார்த்திகேயன் ஆகியோர் பதவியேற்றுக் கொண்டனர்.
சென்னை உயர் நீதிமன்றத்துக்கு 15 நீதிபதிகளை நியமிக்க, உச்ச நீதிமன்ற கொலிஜியம் பரிந்துரைத்திருந்தது. இதனை ஏற்ற குடியரசுத் தலைவர், 13 நீதிபதிகளை நியமித்து கடந்த ஆகஸ்ட் மாதம் உத்தரவு பிறப்பித்திருந்தார். இந்தப் பட்டியலில் இடம் பெற்றிருந்த மாவட்ட நீதிபதிகளான தர்மலிங்கேஸ்வரன், பாலதண்டாயுதம் கார்த்திகேயன் ஆகியோருக்கு சென்னை உயர் நீதிமன்றத்தில் நடைபெற்ற விழாவில் தலைமை நீதிபதி சுஷ்ருத் அரவிந்த் தர்மாதிகாரி பதவிப் பிரமாணம் செய்து வைத்தார். இதன்மூலம் நீதிபதிகளின் எண்ணிக்கை, 67-ஆக உயர்கிறது. காலியிடங்கள் 8-ஆக குறைகிறது.
புதிய நீதிபதிகளை வரவேற்றுப் பேசிய தமிழ்நாடு அரசின் தலைமை வழக்கறிஞர் விஜய் நாராயண், இரு புதிய நீதிபதிகளும் உயர்நீதிமன்றத்துக்கு குறிப்பிடத்தக்க பங்களிப்பை வழங்குவர் என நம்பிக்கை தெரிவித்தார்.
